महिलेने तक्रारीत म्हटल्याप्रमाणे, २२ जानेवारीपासून हा प्रकार सुरु झाला. सुरुवातीला दोघांपैकी एक पुरुष पबमध्ये आला होता. तो सतत माझ्याकडे रोखून बघत होता, तसेच मी जाईल तिथे माझा पाठलाग करत असल्याचे महिलेने म्हटले. स्वच्छतागृहातही तो माझ्या पाठोपाठ आला. काहीवेळानंतर या पुरुषाने माझा मोबाईल क्रमांक मागितला, तसेच मला त्याच्यासोबत पार्टी करण्याची गळ घातली. परंतु, मी त्याला नकार दिल्याचे महिलेने सांगितले. यानंतर २७ जानेवारी आणि २८ जानेवारीला हा पुरुष पुन्हा पबमध्ये आला. तेव्हा त्याच्यासोबत एक मित्र होता. हे दोघेही माझ्याकडे रोखून पाहत होते. माझ्याविषयी आक्षेपार्ह शेरेबाजी करत होते. एवढेच नव्हे तर मला पाहून शिट्टी मारत होते, असे महिलेने म्हटले.
या सगळ्याला कंटाळून संबंधित महिलेने खार पोलीस ठाण्यात तक्रार दाखल केली. त्यानंतर पोलिसांनी गणेश बिष्ट (वय ३९) आणि हरिश कनवार (वय २५) या दोघांना ताब्यात घेतले. यापैकी गणेश बिष्ट शेजारच्याच एका रेस्टॉरंटमध्ये शेफ आहे. पोलिसांनी सध्या या दोघांना जामिनावर सोडले आहे.
Source: https://maharashtratimes.com/maharashtra/mumbai-news/mumbai-woman-pub-manager-stalked-and-harassed-two-booked/articleshow/89247307.cms