हायलाइट्स:
- अस्लम शेख यांनी क्रीडा संकुलाला टिपू सुलतानाचे नाव देण्यात काहीही गैर नसल्याचे म्हटले
- क्रीडा संकुलाच्या विकासाकडे लक्ष न देता भाजपवाले नावावरुन राजकारण करत आहेत
मुंबई: मालाडच्या क्रीडा संकुलाला टिपू सुलतानाचे नाव देण्यावरुन निर्माण झालेला वाद आता चिघळण्याची शक्यता आहे. याठिकाणी भाजप, बजरंग दल आणि राष्ट्रीय स्वयंसेवक संघाच्या कार्यकर्त्यांनी बुधवारी आंदोलन केले. सध्या याठिकाणी भाजप आणि बजरंग दलाच्या कार्यकर्त्यांनी रस्ता रोखून धरला आहे. भाजपच्या कार्यकर्त्यांनी बेस्टच्या बसेसची हवा काढली आहे. त्यामुळे या भागात वाहतूक कोंडी निर्माण झाली आहे. यानंतर पोलिसांनी भाजपच्या कार्यकर्त्यांना ताब्यात घेण्यात आले आहे. मात्र, तरीही याठिकाणी अजून भाजप आणि बजरंग दलाच्या कार्यकर्त्यांची मोठी गर्दी आहे. या आंदोलनाला हिंसक वळण लागण्याची शक्यता आहे. त्यामुळे या परिसरात सध्या तणाव निर्माण झाला आहे. (BJP Bajrang Dal protest to oppose the name of Tipu Sultan of sports complex in Mumbai)
काहीवेळापूर्वीच भाजप आणि बजरंग दलाच्या कार्यकर्त्यांनी मालाडमधील क्रीडा संकुलाच्या बाहेर येत घोषणबाजीला सुरुवात केली. यावेळी पोलिसांनी त्यांना हुसकावून लावल्यानंतर आंदोलकांनी जवळच असणाऱ्या महामार्गावरील वाहतूक रोखून धरली. मुंबईचे पालकमंत्री अस्लम शेख यांच्या पुढाकाराने या क्रीडा संकुलाचे काम करण्यात आले होते. या क्रीडा संकुलाला टिपू सुलतानाचे नाव देण्यात आल्याचे फलक या परिसरात लागले होते. त्यावरुन कालपासून मालाडमधील वातावरण तापायला सुरुवात झाली आहे. मात्र, अस्लम शेख यांनी क्रीडा संकुलाला टिपू सुलतानाचे नाव देण्यात काहीही गैर नसल्याचे म्हटले. क्रीडा संकुलाच्या विकासाकडे लक्ष न देता भाजपवाले नावावरुन राजकारण करत आहेत. गेल्या ७० वर्षांमध्ये देशात कधीही शेर-ए-मैसूर टिपू सुलतानाच्या नावाला कधीही विरोध झाला नाही. यापू्र्वी भाजपच्याच नेत्यांनी मुंबईत रस्त्याला टिपू सुलतानाचे नाव दिले आहे. मग आत्ताच भाजप टिपू सुलतानाच्या नावाला का विरोध करत आहे, असा सवाल अस्लम शेख यांनी विचारला. थोड्याचवेळात अस्लम शेखही मालाडमधील या क्रीडा संकुलाच्या परिसरात दाखल होणार आहे. तेव्हा हा वाद आणखी विकोपाला जाण्याची शक्यता आहे. या पार्श्वभूमीवर पोलिसांनी या परिसरात कडेकोट बंदोबस्त तैनात केला आहे.
दरम्यान, पोलिसांनी या आंदोलनात सहभागी झालेले खासदार गोपाळ शेट्टी आणि अतुल भातखळकर यांना ताब्यात घेतले आहे. त्यामुळे भाजपचे कार्यकर्ते प्रचंड आक्रमक झाले आहेत. हे मैदान मुळात अनधिकृत आहे. ही जागा मैदानासाठी आरक्षित नव्हती. त्यामुळे हे क्रीडा संकुल अनधिकृत असल्याचा दावा खासदार गोपाळ शेट्टी यांनी केला.
आंदोलकांनी पोलिसांच्या गाडीतील हवाही काढली
याठिकाणी आक्रमक झालेल्या भाजप आणि बजरंग दलाच्या कार्यकर्त्यांना पोलिसांनी ताब्यात घेतले. या कार्यकर्त्यांना पोलीस व्हॅनमधून नेत असताना आंदोलकांनी पोलीस व्हॅनमधील हवाही काढली. त्यामुळे पोलिसांची गाडी जागेवरच थांबवावी लागली.
भाजप नेते अतुल भातखळकर आक्रमक
मी आंदोलनस्थळी असून पोलिसांचा अत्याचार सुरू आहे. शरजील इमामसारख्या लोकांवर या महाराष्ट्रात कारवाई होत नाही, पण टिपू सुलतान यांच्याविरोधात आंदोलन करणाऱ्यांवर पोलिसांकडून अत्याचार होतोय, असे अतुल भातखळकर यांनी म्हटले. तसेच भाजप युवा मोर्चाच्या पदाधिकाऱ्यांनी यावेळी शिवसेनेविरोधात घोषणबाजी केली. शिवसेना ही आता औरंगजेबसेना झाल्याचे या कार्यकर्त्यांनी म्हटले
नेमका वाद काय?
मालाडच्या मालवणी परिसरामध्ये बांधण्यात आलेल्या एका क्रीडा मैदानाचे ‘वीर टिपू सुलतान क्रीडा संकुल’ असे नामकरण करण्यावरुन हा वाद निर्माण झाला. स्थानिक आमदार आणि काँग्रेसचे नेते तथा मुंबई शहराचे पालकमंत्री असलम शेख यांच्या आमदार निधीतून हे सर्व काम पूर्णत्वास येत आहे. याचा लोकार्पण सोहळा बुधवार २६ जानेवारी रोजी करण्यात येणार असल्याच्या आशयाचे फलक मालवणी परिसरात लावण्यात आले होते. त्यामुळे कालपासून या परिसरात वातावरण तापायला सुरुवात झाली होती. टिपू सुलतान सुलतान हिंदूविरोधी होता. त्याने हिंदूंची अनेक मंदिरे उध्वस्त केली, हजारो हिंदूंचे धर्मांतरण केले तसेच अनेक हिंदूंची क्रूरपणे हत्या केली आहे. अशा क्रूर आणि हिंदू विरोधी टिपू सुलतानचे नाव क्रीडा मैदानास देण्यास आमचा विरोध आहे. हे नामकरण त्वरित थांबविण्यात यावे, असे निवेदन आम्ही मुख्यमंत्री उद्धव ठाकरे यांना करत आहोत, अशी मागणी भाजपकडून करण्यात आली आहे.
Source: https://maharashtratimes.com/maharashtra/mumbai-news/bjp-and-bajrang-dal-protest-outside-malad-sports-complex-against-giving-name-of-tipu-sultan/articleshow/89136857.cms
