Omicron wave in Mumbai : मुंबईत ओमिक्रॉनची लाट येणार का? कोविड टास्क फोर्सचे सदस्य म्हणाले… – Maharashtra Times

मुंबई: गेल्या काही दिवसांत मुंबईतील करोना रुग्ण संख्येत काही प्रमाणात घट होत असली तरी, ओमिक्रॉनचे रुग्ण वाढत आहे. करोना लाट ओसरत असल्याचे चित्र असतानाच, ओमिक्रॉनबाबत कोविड टास्क फोर्सचे सदस्य डॉ. शशांक जोशी यांनी वेगळाच अंदाज व्यक्त केला आहे. सद्यस्थितीत मुंबईत करोनाचा नवीन व्हेरियंट ओमिक्रॉनचा प्रभाव उच्चांकी पातळीवर आहे. आज, शुक्रवारी साधारण ११ हजार रुग्ण आढळतील, असा अंदाज डॉ. जोशी यांनी व्यक्त केला आहे.

मुंबईत जानेवारीच्या सुरुवातीला करोना रुग्णांची संख्या वाढत होती. मात्र, या आठवड्यात सोमवारी आणि मंगळवारी करोना रुग्णांची संख्या घटू लागली आहे. मागील दोन दिवसांपासून करोना रुग्णांची संख्या कमी झाली आहे. त्यामुळे मुंबईतील करोनाची लाट ओसरली की काय असे चित्र आहे. दुसरीकडे, ओमिक्रॉनबाधितांची मुंबईतील संख्या वाढत आहे. दोन दिवसांपूर्वी मुंबईत २१ ओमिक्रॉनबाधित रुग्ण आढळले होते. दरम्यान, राज्य कोविड टास्क फोर्सचे सदस्य डॉ. शशांक जोशी यांनी ओमिक्रॉनच्या प्रादूर्भावासंबंधी वेगळाच अंदाज व्यक्त केला आहे. मुंबईत ओमिक्रॉनचा अधिक जोर दिसून येत असून, आज ११ हजार रुग्णांची नोंद होऊ शकते, असे ट्विट त्यांनी केले आहे. त्यामुळे सद्यपरिस्थितीत रुग्णालयांतील स्थिती, ऑक्सिजन, आयसीयू यावर अधिक लक्ष केंद्रीत केले जात आहे. डॉक्टरांशी संपर्कात राहा, मास्क वापरा आणि लसीकरण करून सुरक्षित राहा, असा सल्लाही त्यांनी दिला आहे.

mumbai coronavirus latest update : मुंबईतील करोना लाट ओसरली? गेल्या २४ तासांत चित्र बदलले
Maharashtra Coronavirus: राज्यातील करोना निर्बंध कधी हटणार, शाळा कधी सुरु होणार? राजेश टोपेंचं महत्त्वाचं वक्तव्य

महाराष्ट्रात गुरुवारी ४६ हजारांहून अधिक करोना रुग्ण

महाराष्ट्रात गुरुवारी ४६, ४०६ नवीन करोनाबाधित रुग्ण आढळले होते. बुधवारच्या तुलनेत ३१७ रुग्ण कमी नोंदवले गेले. तर ३६ करोनाबाधितांचा मृत्यू झाला होता. आरोग्य विभागाने दिलेल्या माहितीनुसार, राज्यात गुरुवारी दिवसभरात एकाही ओमिक्रॉनबाधित रुग्णाची नोंद झाली नाही.

Corona Update in Maharashtra : करोनानं धास्ती वाढवली; राज्यभरात रुग्णांच्या संख्येत पुन्हा मोठी वाढ, ‘ही’ आहे ताजी स्थिती

मुंबईत गुरुवारी करोना रुग्ण १३ हजारांहून अधिक

मुंबई महापालिकेने गुरुवारी मागील २४ तासांतील करोना रुग्णांची आकडेवारी प्रसिद्ध केली होती. त्यानुसार, २४ तासांत मुंबईत १३, ७०२ नवीन करोनाबाधित रुग्ण आढळले होते. तर नवीन बाधितांपेक्षा बरे झालेले रुग्ण अधिक होते. २०,८४९ रुग्ण बरे होऊन त्यांना रुग्णालयातून सोडण्यात आले होते. रिकव्हरी रेट ८८ टक्क्यांवर पोहोचला होता. मुंबईत एकूण सक्रिय रुग्ण ९५१२३ इतके आहेत. तर, दुपटीचा दर हा ३६ दिवसांवर आला आहे. तर याच कालावधीत मुंबईत ६ जणांचा करोनामुळे मृत्यू झाल्याची नोंद आहे. दिलासादायक बाब म्हणजे करोनाबाधित रुग्णांपैकी ८४ टक्के रुग्णांमध्ये कोणतीही लक्षणे आढळलेली नाहीत.