मुंबईत बुधवारी करोनाचे तब्बल २५०० नवे रुग्ण सापडले होते. २० जानेवारीला मुंबईत करोनाचे केवळ ३०० नवे रुग्ण सापडले होते. त्यामुळे गेल्या आठवडाभराच्या काळात करोनाच्या प्रसाराचा वेग प्रचंड वाढला आहे. या पार्श्वभूमीवर मुख्यमंत्री उद्धव ठाकरे यांची गुरुवारी टास्क फोर्ससोबत बैठक होणार आहे. त्यासाठी राज्य मंत्रिमंडळाची आजची बैठक रद्द करण्यात आली. टास्क फोर्ससोबतच्या आजच्या बैठकीत करोना निर्बंध आणखी कठोर करण्यासंदर्भात चर्चा होऊ शकते. त्यामुळे आज तज्ज्ञांशी चर्चा करुन मुख्यमंत्री राज्य मंत्रिमंडळाच्या बैठकीत करोना निर्बंध कठोर करण्यावर शिक्कामोर्तब करतील, अशी शक्यता आहे.
आरोग्यमंत्री राजेश टोपे यांनी बुधवारी प्रसारमाध्यमांशी बोलताना मुंबईतील परिस्थितीबाबत चिंता व्यक्त केली होती. या पार्श्वभूमीवर मुंबईतील ख्रिसमस आणि न्यू इयर पार्ट्यांना चाप लावण्यात आला होता. रेस्टॉरंट, हॉटेल, बार, पब, रिसॉर्ट, क्लब यासारख्या कुठल्याही खुल्या किंवा बंदिस्त जागी ३० डिसेंबर ते ७ जानेवारी या काळात न्यू इयर सेलिब्रेशनसाठी जमता येणार नाही.
राजेश टोपे यांनी बुधवारी मुंबईत साधारण २२०० रुग्ण सापडतील अशी शक्यता वर्तविली होती. मात्र, काल प्रत्यक्षात २५१० रुग्ण सापडले. त्यामुळे मुंबईतील आरोग्य यंत्रणेची चिंता वाढली आहे. मुंबईत ८०६० सक्रिय कोरोना रुग्ण असून रिकव्हरी रेट ९७ टक्के आहे. सध्या मुंबईतील ४५ इमारती सील आहेत. मुंबईचा करोना पॉझिटिव्हिटी रेट साधारण ४ टक्क्यांवर पोहोचला आहे. ही सर्वाधिक चिंतेची बाब मानली जात आहे.
Source: https://maharashtratimes.com/maharashtra/mumbai-news/section-144-imposed-in-mumbai-cm-uddhav-thackeray-will-meet-task-force-to-discuss-coronavirus-restrictions/articleshow/88582012.cms
