मुंबई बातम्या

मुंबई-हैदराबाद मार्गावरही प्रवास होणार वेगवान – Maharashtra Times

म. टा. प्रतिनिधी, मुंबई

मुंबईकरांचा भविष्यातील रेल्वे प्रवास वेगवान आणि उन्नत करण्यासाठी ‘नॅशनल हायस्पीड रेल्वे कॉर्पोरेशन लिमिटेड’ने (एनएचएसआरसीएल) मुंबई-हैदराबाद बुलेट ट्रेन प्रकल्पासाठी लिडार (लाइट डिटेक्शन अँड रेंजिंग सर्व्हे) सर्वेक्षण सुरू केले आहे. मुंबई-नागपूर, मुंबई-अहमदाबाद आणि आता मुंबई-हैदराबाद या तिन्ही बुलेट ट्रेन प्रकल्पांच्या विविध स्तरावरील कामांमुळे मुंबईत बुलेटवृद्धी होणार आहे.

करोनाकाळातील कडक निर्बंधामुळे सर्वच रेल्वे प्रकल्पांवर परिणाम झाल्याने कामे मंदावली होती. आता करोना रुग्णसंख्येत मोठ्या प्रमाणात घट होत असल्याने पुन्हा एकदा रेल्वे प्रकल्पांच्या कामांनी वेग घेतला आहे. ‘मुंबई-पुणे-हैदराबाद’ बुलेट ट्रेनसाठी (अंदाजे ६५० किमी) सविस्तर प्रकल्प अहवाल (डीपीआर) तयार करण्यात येत असून त्यासाठी ‘एरियल लिडार’ सर्वेक्षण सुरू झाले आहे. यासाठी अत्याधुनिक ‘एरियल लिडार’ आणि ‘इमेजरी सेन्सर’ने बसवलेल्या विमानाने पुण्याहून पहिले उड्डाण केले असून ग्राउंड सर्वेक्षणाशी संबंधित माहिती एकत्र करण्यास सुरुवात केली आहे, असे एनएचएसआरसीएलच्या अधिकाऱ्यांनी ‘मटा’शी बोलताना सांगितले.

मुंबई-हैदराबाद बुलेट ट्रेन प्रकल्पात कामशेत (लोणावळा), पुणे, बारामती, पंढरपूर, सोलापूर, गुलबर्गा आणि हैदराबाद या शहरांचा समावेश करण्यात आला आहे.

बुलेट ट्रेन सर्वेक्षणासाठी ‘एनएचआरसीएल’तर्फे ‘लाइट डिटेक्शन अँड रेंजिंग सर्व्हे’ (लिडार) तंत्रज्ञानाने काम करण्यात येत आहे. ३-४ महिन्यांत सर्व तपशीलवार माहिती एकत्र करण्यात येणार असून या प्रक्रियेला साधारणपणे १२-१८ महिने लागतात. प्रस्तावित मार्गातील विविध भूभाग, उंचवटे, नदी या माहितीचाही समावेश यात करण्यात येणार आहे. अचूक सर्वेक्षण डेटा देण्यासाठी लेझर डेटा, जीपीएस डेटा आणि वास्तविक छायाचित्रांसाठी १०० मेगापिक्सेल कॅमेरा यांचा वापर करण्यात येत आहे.

मुंबई-हैदराबाद आणि मुंबई-नागपूर बुलेट ट्रेन प्रकल्पाचा डीपीआर बनविण्याचे काम सुरू आहे. सध्या ‘मुंबई-अहमदाबाद बुलेट ट्रेन’ प्रकल्प मंजूर झाला असून महाराष्ट्रात एकूण भूसंपादनापैकी सुमारे २५ टक्के भूसंपादन पूर्ण झाले आहे, असे ‘एनएचआरसीएल’च्या प्रवक्त्यांनी सांगितले.

मुंबई-हैदराबाद बुलेट ट्रेन

लांबी : ६५० किमी

मार्गातील शहरे : कामशेत, पुणे, बारामती, पंढरपूर, सोलापूर, गुलबर्गा आणि हैदराबाद

सद्यस्थिती – डीपीआर बनवण्याचे काम सुरू

मुंबई-नागपूर बुलेट ट्रेन

लांबी : ७३६ किमी

मार्गातील शहरे : शहापूर, इगतपुरी, शिर्डी, औरंगाबाद, जालना, मालेगाव, करंजाड, पुलगाव, वर्धा, खापरी डेपो आणि नागपूर

सद्यस्थिती : डीपीआर बनवण्याचे काम सुरू

मुंबई-अहमदाबाद बुलेट ट्रेन

लांबी : ५०८ किमी

स्थानके : ठाणे, विरार, बोईसर, वापी, बिलीमोरा, सूरत, भरुच, वडोदरा, आनंद, अहमदाबाद आणि साबरमती

सद्यस्थिती : महाराष्ट्रात भूसंपादन सुरू, गुजरातमध्ये संपादन पूर्ण

………

Source: https://maharashtratimes.com/maharashtra/mumbai-news/national-high-speed-railway-corporation-limited-has-started-survey-for-mumbai-hyderabad-bullet-train/articleshow/83103412.cms