हायलाइट्स:
- मुंबईत आज १ हजार ३७ नवीन करोना बाधितांची भर.
- दिवसभरात १ हजार ४२७ रुग्णांची करोनावर मात.
- २४ तासांत ३७ रुग्ण दगावले, एकूण मृत्यू १४ हजार ७०८
मुंबई:करोना संसर्गाच्या पहिल्या आणि दुसऱ्या लाटेत सर्वाधिक चटके सोसणाऱ्या मुंबईकरांच्या कोविड विरोधी लढ्याला यश मिळताना दिसत आहे. मुंबईत नवीन बाधितांची संख्या घसरली असून करोनावर मात करणाऱ्या रुग्णांची संख्या वाढत चालली आहे. परिणामी मुंबईचा रिकव्हरी रेट ९४ टक्क्यांवर पोहचला असून राज्यातील इतर शहरांच्या तुलनेत मुंबईने थक्क करणारी कामगिरी करून दाखवली आहे. ( Coronavirus In Mumbai Latest Update )
वाचा: करोना: राज्यात आज २४,१३६ नव्या रुग्णांचे निदान, सक्रिय रुग्णसंख्याही घटली
मुंबई महापालिका प्रशासनाने करोना संसर्गाच्या पहिल्या आणि दुसऱ्या लाटेतही नियोजनबद्धपणे सर्व उपाययोजना केल्या. रुग्णांची कोणत्याही प्रकारे हयगय होऊ नये यासाठी जम्बो आरोग्य सुविधा मुंबईत उभारण्यात आल्या. त्याचा मोठा फायदा कोविड विरोधी लढ्यात होत आहे. मुंबईत ज्या वेगाने करोना संसर्गाचा उद्रेक झाला, त्याच वेगाने रुग्णसंख्येत घट झाल्याचेही पाहायला मिळाले. मुंबईत आता करोनाची दुसरी लाट ओसरत चालली आहे. दैनंदिन रुग्णसंख्या गेले काही दिवस एक हजारांपर्यंत खाली आली आहे. मुंबईत मृतांचा मोठा आकडा ही चिंतेची बाब आहे. मात्र तो आकडाही कमी होताना दिसत आहे.
वाचा: ‘ठाकरे सरकार’वर काँग्रेस नाराज; ‘तो’ जीआर मागे घेतला नाही तर…
मुंबईत आज करोनाने ३७ रुग्ण दगावले. त्यातील २० रुग्ण सहव्याधीग्रस्त होते. मृतांमध्ये २५ पुरुष तर १२ महिलांचा समावेश आहे. यापैकी ३ रुग्ण ४० वर्षांखालील होते, ११ रुग्ण ४० ते ६० वयोगटातील होते तर २३ रुग्ण ६० वर्षांवरील होते. मुंबईत आतापर्यंत करोना संसर्गाने एकूण १४ हजार ७०८ रुग्णांचा मृत्यू झाला आहे. मुंबई महापालिका क्षेत्रात गेल्या २४ तासांत १ हजार ३७ नवीन रुग्णांची भर पडली तर १ हजार ४२७ रुग्ण करोनावर मात करून घरी परतले. मुंबईतील अॅक्टिव्ह रुग्णांची संख्या आता २७ हजार ६४९ इतकी खाली आली आहे. मुंबईत आज एकूण २० हजार ९९० चाचण्या करण्यात आल्या. मुंबईला सर्वात मोठा दिलासा म्हणजे रुग्ण बरे होण्याचे प्रमाण आता ९४ टक्क्यांवर पोहचले आहे तर रुग्ण दुपटीचा कालावधी ३४५ दिवसांवर गेला आहे. चाळी आणि झोपडपट्ट्यांमध्ये सध्या ४४ सक्रिय कंटेनमेंट झोन आहेत तर शहर आणि उपनगरात २०६ इमारती सील करण्यात आलेल्या आहेत.
वाचा: ‘करोनाने मृत्यू होण्याच्या भीतीने अंतरिम जामीन देता येणार नाही’
Source: https://maharashtratimes.com/maharashtra/mumbai-news/mumbai-reports-1037-new-covid-cases-1427-patient-discharges-and-37-deaths-in-the-past-24-hours/articleshow/82950604.cms
