Mumbai Local Train: सर्वांसाठी लोकल ‘या’ तारखेनंतरच; १ जूनपासून निर्बंध शिथील झाल्यास… – Maharashtra Times

मुंबई: राज्यात १ जूनपासून लॉकडाऊनचे निर्बंध काही प्रमाणात शिथील करण्यात येणार आहेत. तसे स्पष्ट संकेत मदत आणि पुनर्वसनमंत्री विजय वडेट्टीवार यांनी दिले आहेत. त्याचवेळी मुंबई उपनगरीय लोकल सेवेबाबत त्यांनी महत्त्वाचे विधान केले आहे. १ जूनपासून निर्बंध शिथील होणार असले तरी लोकल प्रवासावरील निर्बंध मात्र कायम राहणार आहेत, असे वडेट्टीवार यांनी सांगितले आहे. ( Mumbai Local Train Latest Update )

वाचा: रेड झोन वगळता राज्यात १ जूननंतर लॉकडाऊन शिथिल होणार

राज्यात एप्रिल महिन्यात करोना संसर्गाच्या दुसऱ्या लाटेचा मोठा उद्रेक पाहायला मिळाला. दैनंदिन रुग्णसंख्या तब्बल ७० हजाराच्या उंबरठ्यावर पोहचली. त्यामुळे राज्य सरकारने कठोर पावले उचलत लॉकडाऊन सारखे कठोर निर्बंध लादले. मुख्यमंत्री उद्धव ठाकरे यांनी १३ एप्रिल रोजी राज्याला संबोधित करत संचारबंदीसह निर्बंधांची घोषणा केली. १४ एप्रिल रोजी रात्री ८ वाजल्यापासून लादण्यात आलेले हे निर्बंध आठवडाभरानंतर अधिक कठोर करण्यात आले. त्यानंतर निर्बंधांचा कालावधी सातत्याने वाढवला जात असून आता १ जून रोजी सकाळी सात वाजेपर्यंत हे निर्बंध लागू आहेत. या लॉकडाऊनचे सकारात्मक परिणाम दिसू लागले असून प्रामुख्याने मुंबई, पुणे, ठाणे, नागपूर, नाशिक या प्रमुख शहरांमध्ये रुग्णसंख्या वेगाने कमी होत आहे. त्यातूनच १ जूनपासून काही प्रमाणात निर्बंध शिथील होतील अशी आशा निर्माण झाली आहे. याबाबत आज विजय वडेट्टीवार यांनी माध्यमांना माहिती दिली.

वाचा: ‘आमच्यामुळंच सरकार’ असं म्हणणाऱ्या पटोलेंना संजय राऊत यांचं प्रत्युत्तर

राज्यात काही जिल्ह्यांमध्ये रुग्णसंख्या कमी होत असली तरी काही जिल्ह्यांमध्ये रुग्णसंख्या वाढत आहे. ही बाब लक्षात घेत रुग्णवाढ होत असलेले जिल्हे रेड झोनमध्ये टाकून तेथील निर्बंधांबाबत एकंदर स्थिती लक्षात घेऊन निर्णय घेतला जाईल व उर्वरित जिल्ह्यांत निर्बंध शिथील केले जातील, असे वडेट्टीवार यांनी सांगितले. मुख्य म्हणजे मुंबई, पालघर, ठाणे हे जिल्हे रेडझोनमध्ये नसल्याने तो खूप मोठा दिलासा ठरणार आहे. या भागातील आस्थापना तसेच अन्य व्यवहार पुन्हा सुरू होतील, असे स्पष्ट संकेत मिळत आहे. त्यात लोकलसेवेबाबत मात्र कोणताही दिलासा मिळणार नाही, असेच दिसत आहे. लोकलसेवेबाबत विचारले असता १ जूनला मुंबईतील निर्बंध शिथील करण्यात आले तरी पुढचे किमान १५ दिवस सर्वसामान्यांसाठी लोकल खुली केली जाणार नाही, असे वडेट्टीवार यांनी सांगितले. मुंबईत करोनाचा प्रादुर्भाव कमी झाला असला तरी करोना संपलेला नाही. त्यामुळे लोकलबाबत तूर्त निर्णय घेतला जाणार नाही. लोकल सर्वांसाठी खुली केल्यास पुन्हा गर्दी होईल हे निश्चित आहे. म्हणून स्थिती पूर्णपणे नियंत्रणात आल्यावरच त्याबाबत विचार केला जाईल, असे वडेट्टीवार यांनी सांगितले. सध्या अत्यावश्यक सेवेतील कर्मचाऱ्यांसाठी लोकल प्रवासाची मुभा आहे. ती यापुढेही कायम राहील, असेही त्यांनी नमूद केले.

वाचा: ‘केवळ अश्रू ढाळून ‘या’ अपयशाची जबाबदारी झटकता येणार नाही!’