म. टा. विशेष प्रतिनिधी
मुंबई : पश्चिम उपनगरातील विविध भागांत मोठ्या प्रमाणात निर्माण झालेली वाहतूक कोंडी फोडण्यासाठी पालिकेने विविध ठिकाणी सहा पूल बांधण्याचे ठरविले आहे. या प्रस्तावित पुलांमध्ये वर्सोवा खाडी, मार्वे-मनोरी, ओशिवरा नदी इन्फिनिटी मॉल, मार्वे रोड, मालाड खाडी तसेच मालवणी येथील रामचंद्र नाल्यावर पूल बांधले जाणार आहेत. या पुलांच्या बांधणीसाठी पर्यावरणाशी संबंधित असलेल्या परवानगी घेतल्यानंतर प्रत्यक्ष पुलांचे काम हाती घेतले जाईल.
मुंबई पालिकेने वाहतूक कोंडीची समस्या लक्षात घेत पूल उभारणीचा निर्णय घेतला आहे. पण ते करतानाच सहा विविध विभागांची परवानगी आवश्यक आहे. त्यात वन मंत्रालय, पर्यावरणाशी निगडित परवानगी अपेक्षित असल्याने त्यासाठी सल्लागाराची निवड केली आहे. हे सर्व समुद्र पूल असून, या कामासाठी पर्यावरण विभाग, वन मंत्रालय, सागरी मंडळ आदी यंत्रणांची मंजुरी घेणे बंधनकारक आहे. त्यासाठी आवश्यक असलेला पर्यावरणाचा अभ्यास आणि परवानगी आदी कामांसाठी सल्लागारास १ कोटी ८० लाख रुपये दिले जाणार आहेत.
मढ-वर्सोवा पुलाने दिलासा
मालाड पश्चिमेतील समुद्रकिनारी वसलेले मढ आणि अंधेरीतील वर्सोवा हा भाग जोडण्यासाठी बोट वाहतुकीचा वापर होतो. या जलवाहतुकीच्या जोडीला मढ ते वर्सोवा हा पूल बांधला जाणार आहे. या पर्यायी व्यवस्थेने दोन्ही भागांतील स्थानिक, विद्यार्थी, व्यावसायिकांना दिलासा मिळणार आहे. मढ भागातून वाहनाने शहरी भाग वा अंधेरीतील कूपर वा अन्य रुग्णालयांना पोहोचण्यासाठी बराच वेळ लागतो. हा पूल झाला की वाहतुकीची जाणवणारी अडचण संपुष्टात येईल, असे स्थानिकांचे म्हणणे आहे.
मच्छिमारांनाही फायदा
‘मढमधून ससून डॉक वा अन्य मासेबाजारपेठेत जाण्यासाठी रस्त्याने ये-जा करण्यासाठी चार ते पाच तास लागतात. त्याऐवजी पुलाचा पर्याय मिळाल्यास ७५ टक्के वेळ, इंधन, मनुष्यबळ, प्रदूषणात घट असे बरेच फायदे होतील. इतर मार्गांवर येणारा ताण देखील कमी होऊन स्थानिकांना दिलासा मिळेल’, असे महाराष्ट्र मच्छिमार कृती समितीचे सरचिटणीस किरण कोळी यांनी व्यक्त केले आहे.
सल्लागाराकडील जबाबदारी
या पूल बांधणीबाबत नेमण्यात येणाऱ्या सल्लागाराकडून पर्यावरणाचा अभ्यास करण्यात येणार आहे. शिवाय पर्यावरण व वन मंत्रालयासह इतर सरकारी यंत्रणांकडून कामाची मंजुरी घेतली जाणार आहे. भारतीय सागरी मंडळ, भारतीय वन विभाग महाराष्ट्र कोस्टल झोन मॅनेजमेंट प्राधिकरण, संरक्षण विभागासह संलग्न विभागाची मंजुरीही त्याने मिळवायची आहे.
हे असतील नवे सागरी पूल
मढ-वर्सोवा खाडी
मार्वे-मनोरी
मालाड खाडी आणि ओशिवरा नदी
एव्हरशाइननगर येथील रामचंद्र नाला
लगून रोड ते इन्फिनिटी मॉल
धारीवली गाव मार्वे रोड
Source: https://maharashtratimes.com/maharashtra/mumbai-news/bmc-to-construct-six-new-sealink-in-mumbai/articleshow/81424743.cms
