नवी मुंबई : नवी मुंबई महापालिकेच्या सार्वत्रिक निवडणुकीत एकीकडे काँग्रेस, राष्ट्रवादी काँग्रेस आणि शिवसेना या तीन पक्षाच्या महाविकास आघाडीने सत्ताधारी भाजपविरोधात रणशिंग फुंकले असतानाच, दुसरीकडे रिपब्लिकन सेना, शेतकरी कामगार पक्ष, समाजवादी पार्टी सह १० सेक्युलर पक्ष आणि संघटनांनी एकत्र येऊन नवी मुंबई विकास आघाडीच्या माध्यमातून या निवडणुकीत उतरण्याचा निर्णय घेतला आहे. आगामी महापालिका सार्वत्रिक निवडणुकीत आता महाविकास आघाडी, भाजपा व नवी मुंबई विकास आघाडी अशी तिरंगी लढत होण्याची चिन्हे आहेत. त्यामुळे ही निवडणूक अधिक रंगतदार होणार असल्याचे बोलले जात आहे.
वाचा: कंगना प्रकरणात न्यायालयाचे पोलिसांना ‘हे’ आदेश
करोनामुळे एक वर्ष लांबणीवर पडलेली नवी मुंबई महापालिकेची सार्वत्रिक निवडणूक येत्या एप्रिल महिन्यात होण्याची शक्यता व्यक्त केली जात आहे. त्यामुळे सर्वच राजकीय पक्ष संघटनांनी या निवडणुकीत उतरण्यासाठी जोरदार तयारी सुरू केली आहे. महापालिकेत सत्ताधारी असलेल्या भाजप-आरपीआय आठवले गटाला धूळ चारण्यासाठी काँग्रेस, राष्ट्रवादी काँग्रेस व शिवसेना या तीन पक्षाच्या महाविकास आघाडीने जोरदार फिल्डिंग लावताना भाजपच्या नगरसेवकांना फोडण्याची मोहीम हाती घेतली असून सध्या या दोन्ही पक्षात फोडाफोडीचे राजकारण चांगलेच तापले आहे.
वाचा: बीएमसी बजेटवर आदित्य ठाकरेंची छाप; ‘या’ कामांसाठी कोट्यवधींची तरतूद
तर दुसरीकडे नवी मुंबईच्या झोपडपट्टी विभागात वर्षानुवर्षे काम करणाऱ्या रिपब्लिकन सेना, शेतकरी कामगार पक्ष, समाजवादी पार्टी, मार्क्सवादी लालबावटा, घर हक्क संघर्ष समिती, सोशालिस्ट पार्टी, आरपीआय आर.के गट, जनता दल सेक्युलर, महाराष्ट्र जनशक्ती सेना, सीपीएम या सेक्युलर पक्ष व संघटनांना महविकास आघाडी विचारात घेत नसल्याने या १० सेक्युलर पक्ष आणि संघटनांनी एकत्र येऊन नवी मुंबई महापालिकेच्या निवडणुकीत उतरण्याचा निर्णय घेतला आहे.
दरम्यान, गुरुवारी या सेक्युलर पक्ष्यांच्या प्रतिनिधींची बैठक बेलापूर येथील शेतकरी कामगार पक्षाच्या कार्यालयात पार पडली. या बैठकीत एकत्र आलेल्या १० सेक्युलर पक्षांनी नवी मुंबई विकास आघाडीच्या माध्यमातून नवी मुंबई महापालिकेची निवडणूक लढविण्याचा निर्णय घेतला असल्याचे रिपब्लिकन सेनेचे नवी मुंबई प्रमुख तथा नवी मुंबई विकास आघाडीचे सदस्य खाँजामिया पटेल यांनी सांगितले.
१० फेब्रुवारीला लोकार्पण
येत्या १० फेब्रुवारी रोजी नवी मुंबई विकास आघाडीचा लोकार्पण सोहळा वाशीतील विष्णुदास भावे नाट्यIगृहात सायंकाळी होणार असून यावेळी रिपब्लिकन सेनेचे सरसेनानी आनंदराज आंबेडकर, समाजवादी पार्टीचे आमदार अबू असीम आझमी, शेतकरी कामगार पक्षाचे आमदार जयंत पाटील तसेच इतर पक्ष व संघटनेचे प्रमुख पदाधिकारी उपस्थित राहणार आहेत. नवी मुंबई विकास आघाडीच्या वतीने १११ जागा लढविण्यात येणार असून ही निवडणूक धनशक्ती विरुद्ध जनशक्ती अशी होणार असल्याची चर्चा नवी मुंबईत आहे. नवी मुंबई महापालिकेच्या या सार्वत्रिक निवडणुकीत सेक्युलर पक्षाच्या नवी मुंबई विकास आघाडीने उडी घेतल्याने ही यावेळची निवडणूक नेहमीपेक्षा वेगळी असेल, असे राजकीय वर्तुळात बोलले जाते.
वाचा: करोना काळात खासगी रुग्णालयांनी लुटले; आम्ही दाद कुणाकडे मागायची?
Source: https://maharashtratimes.com/maharashtra/navi-mumbai/10-secular-parties-alliance-for-upcoming-navi-mumbai-municipal-corporation-election/articleshow/80717411.cms
