जादूटोणा गुन्ह्यातील आरोपीला दिलासा नाही; अटकेपासून संरक्षण देण्याचा न्यायालयाचा नकार – Maharashtra Times

म. टा. विशेष प्रतिनिधी, मुंबई

वेगवेगळ्या पूजा करून आणि ‘आध्यात्मिक शक्ती असलेली अंगठी’ हाताच्या बोटात घालून आयुष्यातील सर्व समस्या दूर होतील आणि पतीची प्रकृतीही सुधारेल, असे खोटे दावे करून एका महिलेची जवळपास पाच वर्षे फसवणूक केली आणि तिला तब्बल ८७ लाख रुपयांचा चुना लावला, असा आरोप असलेल्या बुर्झीन दारूवाला नामक व्यक्तीला मुंबई उच्च न्यायालयाचे न्यायमूर्ती संदीप शिंदे यांनी नुकताच दिलासा नाकारून त्याचा अटकपूर्व जामीन अर्ज फेटाळला.

अंबरनाथमधील महिलेच्या तक्रारीवरून पोलिसांनी दारूवाला याच्याविरोधात भारतीय दंड संहितेच्या कलम ४२० (फसवणूक) व अन्य कलमांबरोबरच महाराष्ट्र नरबळी आणि इतर अमानुष, अनिष्ट व अघोरी प्रथा आणि जादूटोणा प्रतिबंध व उच्चाटन कायदा, २०१३ या कायद्यातील कलम ३ अन्वये एफआयआर नोंदवला आहे. त्यामुळे दारूवाला याने अॅड. योगेश दळवी यांच्यामार्फत अटकपूर्व जामीन अर्ज केला होता. प्रकरणाचे गांभीर्य ओळखून न्या. शिंदे यांनी तक्रारदार महिलेलाही या अर्जात प्रतिवादी केले होते. त्यानंतर महिलेतर्फे अॅड. रोहित कुर्मी तसेच सरकारी वकील वीरा शिंदे व अनामिका मल्होत्रा यांनी दारूवालाला अटकेपासून संरक्षण देण्यास तीव्र विरोध दर्शवला.

‘बुर्झीन दारूवाला हा माझा परिचित होता. त्यामुळे माझ्या कुटुंबातील समस्या व लिव्हरच्या आजाराने त्रस्त असलेल्या माझ्या पतीचे प्रकृती अस्वास्थ्य याविषयी पूजा व कर्मकांडाने मार्ग निघेल, असे त्याने सांगितल्यानंतर मी त्याच्यावर पूर्ण विश्वास ठेवला. संजय चौबे नावाच्या गुरूजींकडून वेगवेगळ्या पूजा व विधी करून घेऊ असे त्याने सांगितले आणि आध्यात्मिक शक्ती असल्याचा दावा करत एक अंगठीही बोटात घालण्यासाठी दिली. माझी निराश अवस्था व असुरक्षितता हेरून त्याने वारंवार पैसे मागितले. त्यामुळे मी आजपर्यंत त्याच्या बँक खात्यात एकूण १० लाख ९० हजार रुपये पाठवले. त्याने त्याच्या व्यवसायासाठी उधारीवर कर्ज मागितल्यानंतर माझ्याकडे पैसे नसल्याने मी माझ्या मित्र मंडळींकडून उधारीवर घेऊन त्याला ७६ लाख ३८ हजार ८३८ रुपये दिले. मात्र, सर्व कर्मकांड करूनही आयुष्यात काही फरक पडला नसल्याची जाणीव झाल्यानंतर फसवणूक झाल्याचे माझ्या लक्षात आले. म्हणून मी पैसे परत मागितले. मात्र, दारूवालाने टाळाटाळ सुरू केली’, असे महिलेने एफआयआरमध्ये म्हटले.

‘या महिलेने तिचा पती व्यसनाधीन असल्यानेच पैसे वाया जाऊ नयेत, या हेतूने माझ्याकडे पैसे दिले होते. त्यातील ६० लाख रुपये मी तिला रोखीने परत दिले’, असा दावा दारूवालाने केला. मात्र, ‘पैसे परत दिल्याविषयी कोणतेही पुरावे अर्जदाराने दाखवले नाहीत. तसेच तक्रारदार व आरोपीदरम्यानची व्हॉटसअॅपवरील संभाषणे व अन्य पुरावे पाहता आरोपांत तथ्य वाटत आहे. त्यामुळे पोलिसांना कोठडीतील चौकशीची संधी नाकारता येत नाही’, असे निरीक्षण न्यायमूर्तींनी नोंदवले आणि त्याचा अर्ज फेटाळून लावला.