मुंबई बातम्या

पुढील वर्षी मुंबई विद्यापीठाची ५४ नवी महाविद्यालये – Maharashtra Times

म. टा. विशेष प्रतिनिधी, मुंबई

पुढील शैक्षणिक वर्षात मुंबई विद्यापीठाच्या अखत्यातरीत ५४ नवीन कॉलेजे सुरू होण्याची शक्यता आहे. यामध्ये ३४ कला, वाणिज्य आणि विज्ञान कॉलेजे, १२ विधी, सहा रात्र आणि दोन महिला कॉलेजांचा समावेश आहे.

नवीन शैक्षणिक वर्षात कॉलेजांमध्ये विविध नवे अभ्यासक्रम सुरू करणे तसेच काही भागांत आवश्यकतेनुसार नवीन कॉलेजे सुरू करण्यासाठी विद्यापीठ बिंदूनामावली जाहीर करते. यानंतर त्या भागात कॉलेज सुरू करणाऱ्या संस्था अर्ज करतात. त्या विद्यापीठाच्या सर्व पात्रता निकषांमध्ये बसत असतील तर त्यांना राज्य सरकारमार्फत मान्यता देण्यात येते. राज्य सरकारने राज्यभरात शैक्षणिक वर्ष २०१९-२० पासून तब्बल १११ नवीन कॉलेजांना परवानगी दिली होती. यात मुंबई विद्यापीठात एकूण २२ कॉलेजांचा परवानगी देण्यात आली होती. यानंतर मुंबई विद्यापीठाने शैक्षणिक वर्ष २०२१-२२साठी ५४ नवीन ठिकाणी कॉलेजे सुरू करण्याची बिंदूनामावली जाहीर केली आहे. यामध्ये सर्वाधिक कॉलेजे ही मुंबई उपनगर व ठाणे जिल्ह्यात असणार आहेत.

मुंबईत कांदिवली व दादर तर ठाण्यात उल्हासनगर येथे रात्र कॉलेज सुरू करण्याचा विद्यापीठाचा मानस आहे. यंदा पारंपरिक शिक्षणाबरोबरच विधी शिक्षणालाही प्राधान्य देण्यात आल्याचे समोर येत आहे. विधी शिक्षणामध्ये वाढती मागणी लक्षात घेता विद्यापीठाने मागील वर्षीही विधी कॉलेजांना प्राधान्य दिले होते. यंदाही १२ विधी कॉलेजे प्रस्तावित केली आहेत. यात कांदिवली, ठाणे जिल्ह्यातील अडवली भूतवली, कल्याण, सरळगाव, किन्हवली, कांबोरे, शहापूर येथे तर रायगड जिल्ह्यात तीन तर रत्नागिरी जिल्ह्यात दोन विधी कॉलेजांचा प्रस्ताव विद्यापीठाने ठेवला आहे. याला आता कॉलेजांचा कसा प्रतिसाद मिळतो व राज्य सरकार त्याला कशी मान्यता देते यावर पुढील भवितव्य अवलंबून आहे.

‘अशी’ होणार अकरावी ऑनलाइन प्रवेशांची विशेष फेरी

ही सर्व कॉलेजे विनाअनुदानित तत्त्वावर सुरू करण्यास परवानगी देण्यात येणार आहे. यासाठी विद्यापीठाने कॉलेजांच्या पायाभूत सुविधा नेमक्या कशा असाव्यात याबाबतही मार्गदर्शक सूचना जाहीर केल्या आहेत. संस्थांना यंदा ऑनलाइन अर्ज करायचे आहेत. प्रस्तावच्या तीन प्रती व पयाभूत सुविधांच्या चित्रीकरणाची सीडी ३१ डिसेंबरपर्यंत विद्यापीठाकडे सादर करण्याचे कुलसचिवांनी जाहीर केलेल्या सूचनेत स्पष्ट करण्यात आले आहे. याचबरोबर ज्या कॉलेजांना तसेच संस्थांना नवीन अभ्यासक्रम सुरू करावयाचा आहे, त्यांनाही अर्ज करण्यास सांगण्यात आले आहे.

एक लाख विद्यार्थी अद्याप अकरावी प्रवेशाच्या प्रतीक्षेत; शेलारांचे CM ना पत्र

रत्नागिरीत दोन महिला कॉलेजे

मुंबई विद्यापीठाने महिला शिक्षणाला विशेष प्राधान्य मिळावे या उद्देशाने मागील बृहत आराखड्यात दोन कॉलेजांचा प्रस्ताव दिला होता. त्यानंतर शैक्षणिक वर्ष २०२१-२२साठीही रत्नागिरी शहर आणि चिपळूण येथे प्रत्येकी एक महिला कॉलेज प्रस्तावित करण्यात आले आहे.

जिल्हानिहाय कॉलेज

मुंबई शहर २

मुंबई उपनगर १३

ठाणे १३

रायगड ७

रत्नागिरी ६

पालघर ५

सिधुदुर्ग ८

CBSE दहावी, बारावी परीक्षा ऑफलाइन पद्धतीनेच होणार: शिक्षणमंत्री

Source: https://maharashtratimes.com/career/career-news/about-54-new-colleges-will-be-open-in-affiliation-with-mumbai-university/articleshow/79910372.cms