मुंबई बातम्या

मुंबई-ठाणे प्रवास करणाऱ्यांसाठी मुख्यमंत्री ठाकरेंनी दिली खूषखबर – Maharashtra Times

म. टा. विशेष प्रतिनिधी, मुंबई

मुंबईकरांसोबतच ठाणेकरांचाही दैनंदिन प्रवास आरामदायी आणि गतिमान होण्यासाठी उपयुक्त ठरणाऱ्या मेट्रो मार्गिका ४ आणि ४ अ हे दोन प्रकल्प वेळेत पूर्ण होतील, अशी ग्वाही देतानाच, मुंबई महानगर परसिरातील सार्वजनिक वाहतूक व्यवस्थेत हा प्रकल्प आमुलाग्र बदल घडवेल, असे मुख्यमंत्री उद्धव ठाकरे यांनी शुक्रवारी येथे सांगितले. मेट्रो मार्गिकांच्या या कामासाठी ‘केएफडब्ल्यू’ या जर्मन विकास बँकेकडून ५४५ दशलक्ष युरो इतक्या रक्कमेचे कर्ज इंडो-जर्मन विकास सहाय्य अंतर्गत मंजूर झाले आहे.

मुंबई मेट्रो मार्गिका ४ व ४ अ या प्रकल्पासाठी जर्मनीच्या केएफडब्ल्यु विकास बँकेकडून घेण्यात येणाऱ्या कर्ज करारावर मुख्यमंत्री ठाकरे यांच्यासह उपमुख्यमंत्री अजित पवार, नगरविकासमंत्री एकनाथ शिंदे, राज्यमंत्री प्राजक्त तनपुरे यांच्या उपस्थितीत स्वाक्षरी करण्यात आली. त्यावेळी मुख्यमंत्री बोलत होते. सह्याद्री अतिथीगृह येथे झालेल्या कार्यक्रमात एमएमआरडीएचे महानगर आयुक्त आर. ए. राजीव आणि जर्मनीचे मुंबईतील वाणिज्यदूत जे. मोहार्ड यांनी करारावर स्वाक्षरी केली. मुख्यमंत्री ठाकरे म्हणाले, ‘आजचा दिवस महत्त्वाचा आहे. मुंबईकरांचा दैनंदिन प्रवास अधिक सुसह्य होण्यासाठी मेट्रोच्या प्रकल्पांना गती दिली जात आहे. मेट्रो मार्गिका ४ आणि ४ अ साठी केएफडब्ल्यू संस्थेने मंजूर केलेले भारतातील हे सर्वात जास्त रक्कमेचे कर्ज असल्याचे त्यांनी सांगितले. सुमारे दोन लाख प्रवासी दररोज ठाणे-मुंबई प्रवास करतात. पुढील काही वर्षांत मुंबईतील सार्वजनिक दळणवळण व्यवस्थेत आमूलाग्र बदल होणार असून, त्यामुळे मुंबईकरांचे गतिमान प्रवासाचे स्वप्न साकार होणार आहे.

यावेळी नगरविकासमंत्री शिंदे म्हणाले, ‘केएफडब्ल्यू संस्था महाराष्ट्रासोबत पहिल्यांदा करार करीत आहे. हा प्रकल्प मुंबई महानगरातील प्रवाशांसाठी वरदान ठरणार असून, याप्रकल्पामुळे मुंबई आणि ठाणे हे दोन महनगरे जोडली जाणार आहेत.’ तसेच करोनाकाळात जम्बो उपचारांच्या सुविधांच्या उभारणीत एमएमआरडीएने महत्त्वाची भूमिका बजावल्याबद्दल नगरविकासमंत्री शिंदे यांनी कौतुक केले.

प्रकल्पाची वैशिष्ट्ये

– देशातील इतर प्रकल्पासाठी दिलेल्या कर्जपुरवठ्यापैकी हे कर्ज सर्वात कमी व्याजदराचे आहे.

– मुंबई मेट्रो मार्गिका ४ वडाळा-कासारवडवली आणि मार्गिका ४-अ कासारवडवली ते गायमुख या मेट्रो मार्गिकांच्या अंमलबजावणीसाठी केएफडब्ल्यू या जर्मन विकास बँकेकडून एकूण ५४५ दशलक्ष युरो इतक्या रक्कमेचे कर्ज इंडो जर्मन विकास सहाय्य अंतर्गत मंजूर.

– मुंबई मेट्रो मार्गिका ४ व ४- अ या प्रकल्पासाठी कर्ज करारांवर स्वाक्षऱ्या

– केएफडब्ल्यू या संस्थेने मंजूर केलेले ५४५ दशलक्ष युरो कर्ज हे देशातील सर्वात जास्त रक्कमेचे कर्ज आहे.

– हे कर्ज तीन भागांमध्ये मंजूर करण्यात आले आहे. त्यानुसार ३४५ दशलक्ष युरो इतकी रक्कम विकासकर्ज अथवा कमी व्याज दरकर्ज म्हणून मंजूर करण्यात आली असून, कर्ज २ टप्प्यांमध्ये वितरीत होणार.

– पहिल्या टप्प्यात २५५ दशलक्ष युरो हे रोलिंग स्टॉक आणि स्वयंचलित भाडे प्रणालीच्या उभारणीसाठी; तर दुसऱ्या टप्प्यांत ९० दशलक्ष युरो निधी बहुवाहतूक परिवहन एकत्रिकरणासाठी उपलब्ध होणार आहे.

– २०० दशलक्ष युरो इतकी रक्कम अतिरिक्त विकास सहाय्य कर्ज हे इतर रेल्वे प्रणालीसाठी उपलब्ध होणार आहे. २.२ दशलक्ष युरो हे परिचालन व परिरक्षण संस्था कार्यान्वित करण्यासाठी अनुदान म्हणून उपलब्ध होणार आहे.

Source: https://maharashtratimes.com/maharashtra/mumbai-news/mumbai-metro-line-4-and-metro-line-4-a-will-complete-within-time-says-cm-uddhav-thackeray/articleshow/79084959.cms