मुंबई बातम्या

Mumbai Eye: ‘मुंबई आय’ प्रकल्प रखडणार? – Maharashtra Times

म. टा. प्रतिनिधी, मुंबई

‘लंडन आय’च्या धर्तीवर मुंबईत येणाऱ्या पर्यटकांनाही ८०० फूट उंचीवरून मुंबईचे दर्शन व्हावे यासाठी ‘मुंबई आय’ची निर्मिती केली जाणार आहे. मात्र, अनेक महिने उलटूनही प्रकल्प संचलनासाठी सल्लागार मिळत नसल्याने हा प्रकल्प आणखी काही काळ रखडणार हे जवळपास स्पष्ट झाले आहे. प्रकल्पाच्या जागा निश्चितीबाबत तिढा निर्माण झाल्याने ही परिस्थिती ओढवल्याचे कळते आहे. यादरम्यान प्राधिकरणाने काही दिवसांपूर्वी दुसऱ्यांदा निविदा विनंती प्रस्ताव प्रसिद्ध केला आहे.

पर्यटनाला चालना देण्याच्या दृष्टीने वांद्रे येथे ‘मुंबई आय’ बनवण्याच्या योजनेवर काम सुरू करण्यात आले आहे. यासाठी देशविदेशातून जवळपास ८ कंपन्यांनी या प्रकल्पात रस दाखविला होता. विशेष म्हणजे, यात ‘लंडन आय’ आणि ‘दुबई आय’ या दोन्ही प्रकल्पांची निर्मिती करणाऱ्या कंपन्यांचा देखील समावेश आहे. पर्यटनासह महसूलवाढीच्या दृष्टीने महत्त्वाच्या प्रकल्पांपैकी एक असलेल्या ‘मुंबई आय’ प्रकल्पासाठी मुंबई महानगर प्रदेश विकास प्राधिकरणाकडून यापूर्वी ६ मार्चपर्यंत निविदा मागवण्यात आल्या होत्या. मात्र, अपेक्षित प्रतिसाद न मिळाल्याने ही मुदत १५ दिवसांनी वाढवण्यात आली होती. त्यानंतर लॉकडाउन जाहीर झाल्याने या प्रकल्पाचा विषय काही काळ मागे पडला होता. मात्र, पुन्हा एकदा निविदा विनंती प्रस्ताव जाहीर करण्यात आला आहे. त्यामुळे मुंबईचे सौंदर्य न्याहाळण्यासाठी आता मुंबईकरांना आणखी काही काळ प्रतीक्षा करावी लागणार आहे.

या प्रकल्पासाठी नेमणूक झालेल्या सल्लागारास व्यवहार्यता पूर्वाभ्यास करणे, तांत्रिक- आर्थिक व्यवहार्यता अभ्यास करणे, तपशीलवार प्रकल्प अहवाल (डीपीआर), निविदा तयार करणे, एजन्सीच्या निवडीसाठी व्यवस्थापन निविदा प्रक्रिया राबवणे अशा विविध जबाबदाऱ्या सांभाळायच्या आहेत.

नेमकी अडचण काय?

हा प्रकल्प २००६ मध्ये पालिकेकडे प्रस्तावित होता. मात्र, पालिकेने या प्रकल्पात स्वारस्य न दाखवल्याने तो अद्याप रखडला होता. नवे सरकार आल्यानंतर उपमुख्यमंत्री अजित पवार यांनी या प्रकल्पाची पुनर्घोषणा करत ‘मुंबई आय’ प्रकल्प पुन्हा उजेडात आणला. मात्र, एमएमआरडीएचा निश्चय आणि निविदाकारांच्या मागण्या या चक्रव्यूहात हा प्रकल्प अडकल्याच्या चर्चा सध्या रंगत आहेत. वांद्रेमध्ये प्रस्तावित जागेत ‘मुंबई आय’ प्रकल्प उभारण्यास वाहतुकीची समस्या उद्भवण्याची शक्यता आहे. यामुळे भविष्यात पर्यटकांना अडचणीचा सामना करावा लागू शकतो. तसेच ही जागा अपुरी पडत असल्याचेही मत कंपन्यांनी यापूर्वी नोंदवले आहे. मात्र तांत्रिक कारणांमुळे सल्लागार नेमण्यासाठी पुन्हा नोटीस बजावण्यात आल्याचे एमएमआरडीएच्या अधिकाऱ्यांनी म्हटले आहे.

Source: https://maharashtratimes.com/maharashtra/mumbai-news/mumbai-i-project-will-also-be-delayed/articleshow/79024485.cms