मुंबई बातम्या

लसीकरणातून आम्हाला का वगळता? – Maharashtra Times

‌म.टा. विशेष प्रतिनिधी, मुंबई

आरोग्यक्षेत्रात काम करणाऱ्यांचे पहिल्या टप्प्यात लसीकरण करण्याचा निर्णय केंद्र सरकारने घेतला आहे. मात्र, यामध्ये बॉम्बे नर्सिंग अॅक्ट अंतर्गत ज्या आरोग्य कर्मचाऱ्यांची नोंद झाली आहे, त्यांनाच लस देण्यात येईल, असा निर्णय घेण्यात आला आहे. ज्या डॉक्टरांचा यात समावेश नाही त्यांनी काय करायचे, हे डॉक्टर करोना काळामध्ये वैद्यकीय सेवा देत आहेत. त्यामुळे हा निर्णय त्यांच्यासाठी गैरलागू, जाचक नाही का, असाही प्रश्न त्यांनी उपस्थित केला आहे.

करोना लसीच्या संदर्भात केईएम आणि नायर या पालिका रुग्णालयामध्ये चाचण्या सुरू आहे. त्याचा पहिला टप्पा पार पडला असून, २९ दिवसांनी या लसीचा दुसरा डोस सहभागींना दिला जात आहे. वरिष्ठ वैद्यकीय तज्ज्ञांनी दिलेल्या माहितीनुसार नव्या वर्षामध्ये लस उपलब्ध होण्याची शक्यता आहे, त्यादृष्टीने नियोजन सुरू आहे. संसर्गाच्या क्षेत्रात सर्वाधिक काम करणाऱ्या वैद्यकीय कर्मचारी, डॉक्टर, परिचारिका या आरोग्यकर्मचाऱ्यांना ही लस पहिल्या टप्प्यात देण्यात येणार आहे. केंद्र सरकारने या सर्व आरोग्य कर्मचाऱ्यांची संपूर्ण माहिती तीन दिवसांत देण्याचे निर्देश दिले होते. या कायद्यातंर्गत जनरल प्रॅक्टिशनर्सची नोंद करण्यात आलेली नाही. त्यामुळे या डॉक्टरांना लस कशी मिळणार, असाही प्रश्न उपस्थित होत आहे. इंडियन मेडिकल असोसिएशनचे प्रमुख डॉ. अविनाश भोंडवे यांनी जीपीसह हा प्रश्न अनेक इतर नोंदणी नसलेल्या डॉक्टरांच्या संदर्भातही उपस्थित होणार असल्याचे सांगितले. जे डॉक्टर तळमळीने कोविड काळामध्ये वैद्यकीय सेवा देत होते. त्यांना लस मिळणार नाही. केंद्र सरकारने डॉक्टर, तसेच आरोग्य कर्मचाऱ्यांचे नाव, पत्ता, संपर्क क्रमांक, अनुभव, शैक्षणिक पात्रता, सेवा देण्याचा कालावधी अशी इत्थंभूत माहिती घेण्यास सुरुवात केली आहे.

करोना काळामध्ये मृत्यू पावलेल्या ६० जणांपैकी ४० जण हे जनरल प्रॅक्टिशनर आहेत. त्यातील अनेक जणांना अद्याप विम्याचे दावे मिळाले नाहीत. करोनाचे निश्चित निदान होण्यापूर्वी अनेक मुंबईकरांना या डॉक्टरांनी मदतीचा हात दिला आहे. दंतरुग्ण तसेच फिजिओथेरपी देणाऱ्या डॉक्टरांसारख्या गटाला यातून वगळले जाईल. दोन दिवसांपूर्वी झालेल्या झूम मिटिंगमध्ये बॉम्बे नर्सिग अॅक्टतंर्गत नोंदणी असलेल्या डॉक्टरांना लसीकरणामध्ये सामावून घेण्यात येईल, असे सांगण्यात आले.

Source: https://maharashtratimes.com/maharashtra/mumbai-news/doctor-ask-questions-to-central-government-over-corona-vaccine-to-only-register-doctor-under-bombay-nursing-act/articleshow/78957668.cms