मुंबई बातम्या

पायल, रिचाला हायकोर्टाने दिली दोन दिवसांची मुदत – Maharashtra Times

म. टा. विशेष प्रतिनिधी, मुंबई

दिग्दर्शक अनुराग कश्यपविरोधात लैंगिक छळवणुकीची तक्रार मांडताना अभिनेत्री पायल घोष हिने अभिनेत्री रिचा चढ्ढाविरोधातही आक्षेपार्ह विधाने केल्याने निर्माण झालेला वाद मिटवण्यासंदर्भात मुंबई उच्च न्यायालयाने या दोघींना सोमवारी दोन दिवसांची अखेरची मुदत दिली. परस्पर संमतीने वाद मिटवण्याचे लेखी संमतीपत्र बुधवारी सादर करा, असे निर्देश न्या. ए. के. मेनन यांनी दोघींना दिले.

‘अनुरागने २०१४मध्ये माझ्यासमोर अश्लील कृत्य करून लैंगिक छळवणूक केली’, असा आरोप पायलने सोशल मीडियावर एक व्हिडीओ पसरवून केला होता. अभिनेत्री रिचा चढ्ढा, हुमा कुरेशी व माही गिल या अभिनेत्रीही अनुरागच्या लैंगिक छळवणुकीला बळी ठरल्या, असेही पायलने म्हटले होते. त्यामुळे ‘या प्रकरणात माझे नाव विनाकारण ओढून पायलने माझी बदनामी केली आहे. त्यामुळे तिला एक कोटी दहा लाख रुपयांची नुकसानभरपाई देण्याचे निर्देश द्यावेत. तसेच यापुढे आणखी बदनामी करण्यापासून रोखावे’, अशी विनंती करत रिचाने पालयविरोधात अब्रुनुकसानीचा दावा दाखल केला आहे.

रिचासोबतचा वाद मिटवायचा असून तिची माफी मागण्याची तयारी असल्याचे म्हणणे पायलने अॅड. नितीन सातपुते यांच्यामार्फत मागील सुनावणीत मांडले होते. त्यामुळे माफीचा तपशील ठरवण्यासंदर्भात न्या. मेनन यांनी सोमवारी सुनावणी ठेवली होती. मात्र, ‘पायलने न्यायालयात माफीची तयारी दर्शवली आणि नंतर ट्विटरवर व्यक्त होताना माफी मागणार नसल्याचे म्हटले’, असे रिचाने अॅड. सवीना बेदी सच्चर यांच्यामार्फत न्यायालयाच्या निदर्शनास आणले. तर ‘हा वाद न्यायप्रविष्ट असतानाच खटला जिंकला असल्याचे रिचा प्रसारमाध्यमांना सांगत सुटली आहे. हे योग्य नाही. यामुळे सोशल मीडियावर लोकांनी मला ट्रोल करण्यास सुरुवात केली आहे’, असे म्हणणे पायलने अॅड. सातपुते यांच्यामार्फत मांडले. तेव्हा ‘रिचाने काहीही चुकीचे केले नाही, जे न्यायालयात घडले त्याचेच वार्तांकन प्रसारमाध्यमांनी केले’, असे म्हणणे अॅड. बेदी यांनी मांडले.

‘वाद मिटवायचा असल्याने माफी मागण्याची तयारी आहे. मात्र, रिचाने यापुढे माझ्याविरोधात कोणताही खटला वगैरे भरू नये, अशी माझी अट आहे’, असे पायलचे म्हणणे असल्याचे सातपुते यांनी सांगितले. अखेरीस ‘वाद मिटवायचा असेल तर परस्परांशी बोला, इतरांशी बोलू नका’, असे खडे बोल न्यायमूर्तींनी दोघींना सुनावले. तसेच परस्परसंमतीने वाद मिटवण्यासाठी अखेरची संधी देत असून दोन दिवसांत लेखी संमतीपत्रक सादर करा, असे निर्देश न्यायमूर्तींनी दिले. त्याचबरोबर या प्रकरणात रिचाची बदनामी करणारे कोणीही काहीही प्रसिद्ध करू नये, हा अंतरिम आदेश न्यायमूर्तींनी कायम ठेवला.

Source: https://maharashtratimes.com/maharashtra/mumbai-news/bombay-hc-gives-richa-chadha-payal-ghosh-2-days-to-file-consent-terms-for-settling-dispute/articleshow/78646097.cms