मुंबई बातम्या

Sushantsingh Rajput: सुशांतच्या बहिणींच्या याचिकेवर तातडीनं सुनावणीस नकार – Maharashtra Times

मुंबई: ‘सुशांतसिंह राजपूत याच्या बहिणी प्रियांका सिंग व मीतू सिंग यांनी केलेल्या फौजदारी रिट याचिकेवर तातडीने सुनावणी घेण्यास मुंबई उच्च न्यायालयानं नकार दिला आहे. (Sushant Singh Rajput Case)

सुशांतला त्याच्या बहिणींनी डॉक्टरांच्या प्रिस्क्रिप्शनविना औषधे दिली, असा आरोप करत अभिनेत्री रिया चक्रवर्ती हिनं केला आहे. रियानं त्यांच्याविरोधात एफआयआर नोंदवला आहे. तो रद्द करण्याची विनंती करणारी फौजदारी रिट याचिका दोघींनी न्यायालयात केली आहे. ‘याविषयी सध्या पोलिसांचा तपास सुरू असल्यानं आम्ही त्यात हस्तक्षेप करू इच्छित नाही. त्यामुळं या टप्प्यावर तातडीनं सुनावणी घेण्याचे कारण दिसत नाही’, असं नमूद करून तातडीच्या सुनावणीस उच्च न्यायालयानं नकार दिला.

वाचा: ‘सुशांतसिंह प्रकरणाचा भाजपच्या प्रतिमेवर परिणाम होणार नाही’

तक्रारदार रिया चक्रवर्तीच्या वकिलांसह एफआयआरविषयी तपास करत असलेल्या सीबीआयला एक आठवड्यात उत्तर दाखल करण्यासाठी मुदत देऊन हायकोर्टाने सुनावणी पुढील मंगळवारी ठेवली.

रियाच्या कोठडीत वाढ

अभिनेत्री रिया चक्रवर्तीच्या न्यायालयीन कोठडीत विशेष एनडीपीएस न्यायालयाने आणखी १४ दिवसांची वाढ केली आहे. रियाचा भाऊ शौविक चक्रवर्ती, आरोपी सॅम्युएल मिरांडा, दिपेश सावंत, झैल विलात्रा, अब्देल बसित परिहार, ड्वेन फर्नांडिस यांच्या न्यायालयीन कोठडीतही २० ऑक्टोबरपर्यंत वाढ करण्यात आली आहे.

वाचा: कोविड सेंटरमधून पळाले आणि कार चोरली, पण ९ दिवसांनंतर…

Source: https://maharashtratimes.com/maharashtra/mumbai-news/bombay-high-court-on-sushant-singh-rajputs-sisters-plea/articleshow/78511575.cms