म. टा. प्रतिनिधी, मुंबई
छत्रपती शिवाजी महाराज आंतरराष्ट्रीय विमानतळावरील कार्गो हाताळणी आता डिजिटल पद्धतीने होत आहे. यासाठी ‘जीमॅक्स’ या तंत्रज्ञानाचा अवलंब केला जात आहे. यामुळे सुरक्षित वावराचे नियम पाळून सुरळीत असे कार्गो पाठवता येणार आहेत.
या तंत्रज्ञानांतर्गत कार्गो पाठविणाऱ्या कंपनीने आगाऊ कार्गो बुकिंग करणे अत्यावश्यक आहे. बुकिंगनंतर संबंधित कंपनीला स्वयंचलित पद्धतीने निश्चित वेळ दिली जाते. त्या नेमक्या वेळी तिथे कार्गो सामान आणल्यानंतर कुठल्याही औपचारिक सोपस्कारांविना कार्गो रवाना करता येतो. यामुळे एकाचवेळी कार्गोची गर्दी होत नाही. तसेच विना विलंब आणि सुरक्षित वावराच्या नियमांद्वारे सामान विमानात चढवणे सोपे होत आहे.
हे तंत्रज्ञान मुंबई आंतरराष्ट्रीय विमानतळ लिमिटेडकडे (मिआल) याआधीही होते. या तंत्रज्ञानाला जागतिक वितरण प्रणालीशी जोडण्यात आले आहे. यामुळे जगभरातून कुठूनही मुंबई विमानतळावर कार्गोचे बुकिंग करता येणार आहे.
Source: https://maharashtratimes.com/maharashtra/mumbai-news/digital-cargo-handling-of-mumbai-airport/articleshow/78093611.cms
