Mumbai University Idol Exams 2020: मुंबई विद्यापीठाच्या दूर व मुक्त अध्ययन संस्थेने (आयडॉल) विविध अभ्यासक्रमांच्या अंतिम वर्षाच्या परीक्षांच्या तारखा जाहीर केल्या आहेत. यानुसार पदवीस्तरावरील अंतिम वर्षाच्या परीक्षा ३ ऑक्टोबरपासून तर पदव्युत्तर अभ्यासक्रमाच्या द्वितीय वर्षाच्या परीक्षा ८ ऑक्टोबरपासून घेण्यात येणार आहेत. विद्यापीठाच्या निर्देशानुसार या परीक्षा ऑनलाइन घेण्यात येणार आहेत.
करोनाच्या पार्श्वभूमीवर विद्यापीठाने उन्हाळी सत्राच्या परीक्षा ऑनलाइन व बहुपर्यायी प्रश्नाच्या स्वरूपात घेण्याचे निर्देश दिले आहेत. त्यानुसार आयडॉलच्या उन्हाळी सत्राच्या सर्व लेखी परीक्षा या ऑनलाइन व बहुपर्यायी प्रश्नाच्या स्वरूपात घेण्यात येणार आहेत. यानुसार पदवीस्तरावरील तृतीय वर्ष बीए, बीकॉम, बीएस्सी कम्प्युटर सायन्स व बीएस्सी आयटी सत्र ६ या अंतिम वर्षाच्या परीक्षा ३ ऑक्टोबर २०२०पासून घेण्यात येणार आहेत तर पदव्युत्तर अभ्यासक्रमाच्या द्वितीय वर्ष एमए, एमए शिक्षणशास्त्र, एमकॉम, एमएस्सी (गणित, आयटी व कम्प्युटर सायन्स ) व एमसीए सत्र ६ च्या परीक्षा ८ ऑक्टोबरपासून घेण्यात येणार आहेत. प्रथम व द्वितीय वर्ष बीए, बीकॉम, बीएस्सी कम्प्युटर सायन्स, बीएस्सी आयटी व एमसीए या अभ्यासक्रमाच्या पुनर्परीक्षार्थी असलेल्या विद्यार्थ्यांच्या परीक्षा २५ सप्टेंबरपासून घेण्यात येणार आहेत. तर पदवीस्तरावरील प्रथम व द्वितीय वर्ष बीए, बीकॉम, बीएस्सी कॉम्प्युटर सायन्स या अभ्यासक्रमाच्या २०१९-२० या शैक्षणिक वर्षात प्रवेश घेतलेल्या विद्यार्थ्यांच्या परीक्षा तसेच पदव्युत्तर प्रथम वर्ष एमए, एमए शिक्षणशास्त्र, एमकॉम व एमएस्सी (गणित, आयटी, कम्प्युटर सायन्स ) या अभ्यासक्रमाच्या २०१९-२० या शैक्षणिक वर्षात प्रवेश घेतलेल्या व पुनर्परीक्षार्थी असलेल्या विद्यार्थ्यांच्या परीक्षा नोव्हेंबर २०२०मध्ये घेण्यात येणार आहेत.
ऑनलाइन वर्गांसाठी विद्यार्थ्यांना स्मार्टफोन, डेटापॅक देणार ‘हे’ विद्यापीठ
क्वेश्चन बँक, एमसीक्यू, ऑनलाइन लेक्चर्स…प्राध्यापकांचीच परीक्षा!
विद्यापीठाने दिलेल्या निर्देशानुसार या परीक्षा ऑनलाइन व बहुपर्यायी प्रश्नाच्या स्वरूपात घेण्यात येणार आहेत. या परीक्षा ५० गुणांच्या असतील व त्याचा वेळ एक तासाचा असणार आहेत. विद्यार्थ्यांसाठी एक नमुना प्रश्नपत्रिका देण्यात येणार असून अनुभवासाठी सराव परीक्षा घेण्यात येणार आहे.
Source: https://maharashtratimes.com/career/career-news/final-year-exams-2020-mumbai-university-idol-exams-timetable-declared/articleshow/78108005.cms
