मुंबई बातम्या

Kangana Ranaut : …तर मुंबई कायमची सोडेन; कंगनाने मुंबई पोलीस आणि गृहमंत्र्यांना केलं ‘हे’ चॅलेंज – Maharashtra Times

मुंबई: अभिनेत्री कंगना राणावतच्या ड्रग्सच्या लिंकची चौकशी करण्यात येणार असल्याचं गृहमंत्री अनिल देशमुख यांनी स्पष्ट केल्यानंतर कंगनाने आता देशमुख आणि मुंबई पोलिसांना आव्हान दिलं आहे. माझा ड्रग्स पेडलरचा संबंध असल्याची चौकशी करा. त्यात जर मी दोषी आढळले तर कायमची मुंबई सोडेन, असं आव्हानच कंगनाने दिलं आहे.

कंगना राणावतने ट्विट करत थेट मुंबई पोलीस आणि अनिल देशमुख यांनाच हे आव्हान दिलं आहे. मुंबई पोलीस आणि अनिल देशमुख यांनी केलेल्या उपकारामुळे मी खूप खूष आहे. त्यांनी माझी नक्कीच ड्रग्सची टेस्ट करावी. माझे कॉल रेकॉर्ड्सही तपासावेत. तुम्हाला जर ड्रग्स पेडलरशी माझे संबंध असल्याचं आढळून आलं तर मी माझी चूक कबूल करेन आणि कायमची मुंबई सोडून देईन, असं कंगनाने म्हटलं आहे.

दरम्यान, कंगणावर ड्रग्स घेत असल्याचा आरोप असून त्याची चौकशी मुंबई पोलीस करेल, असं राज्याचे गृहमंत्री अनिल देशमुख यांनी म्हटलं आहे. कंगनाने मुंबई पोलिसांवर टीका करतानाच मुंबई मला पाकव्याप्त काश्मीर असल्यासारखी वाटत असल्याची मुक्ताफळे उधळली होती. ‘टाइम्स नाऊ’ने दिलेल्या वृत्तानुसार आता कंगनाच्या ड्रग्स कनेक्शनची चौकशी होणार आहे. अभिनेता शेखर सुमन यांचा मुलगा अध्ययन सुमन याने एक मुलाखत दिली होती. त्या मुलाखतीचा आधार घेऊन कंगनाच्या ड्रग्स कनेक्शनची चौकशी होणार असल्याचं सूत्रांनी सांगितलं.

अध्ययन सुमनची एक मुलाखत व्हायरल झाली आहे. त्यात कंगनाने त्याला कोकेन घेण्याचा आग्रह केल्याचा दावा केला आहे. आपण हॅश ट्राय केलं होतं. पण ते आवडलं नव्हतं. त्यामुळेच आपण कोकेन घेण्यास नकार दिला होता. कोकेन घेण्यास नकार दिल्यामुळे कंगनाचे आणि माझे कडाक्याचे भांडणही झालं होतं, असंही अध्ययनने म्हटलं आहे.

kangana ranaut : कंगनाच्या अडचणीत वाढ; ड्रग्स कनेक्शनची चौकशी होणार

kangana ranaut : पालिकेकडून कंगनाचं कार्यालय सील; नोटिशीत दिला ‘हा’ इशारा

याबाबत ‘नवभारत टाइम्स’ने अध्ययनशी संवाद साधला. मात्र, या गोष्टीला अधिक महत्त्व न देण्याची विनंती त्याने ‘नवभारत टाइम्स’कडे केली. सकारात्मक दृष्टीकोण घेऊन मी पुढे जात आहे, असं अध्ययनने म्हटलं आहे. बॉलिवूडमध्ये हायप्रोफाइल पार्ट्यांमध्ये ड्रग्सचा मोठ्या प्रमाणावर वापर होतो. मात्र, अशा पार्ट्यांमधून आपण नेहमीच लांब राहिलो आहे, असं त्यांनी यापूर्वी कबूल केल्याचं ‘नवभारत टाइम्स’ने म्हटलं आहे.

मुंबईचा अपमान करणाऱ्या कंगनाला दणका; विधान परिषदेत हक्कभंग

Source: https://maharashtratimes.com/maharashtra/mumbai-news/will-leave-mumbai-forever-if-any-drug-links-found-kangana-ranaut/articleshow/78000010.cms