मुंबई बातम्या

…तर मुंबई रुळावर येईल – Maharashtra Times

म. टा. विशेष प्रतिनिधी, मुंबई

सप्टेंबर आणि ऑक्टोबरमध्ये टप्प्याटप्प्याने सरकारी आणि खासगी कार्यालये तसेच रेल्वेसह इतर वाहतूक सेवा सुरू करावी. त्यामुळे मुंबईकरांमध्ये डिसेंबर व जानेवारीत सामूहिक प्रतिकारशक्ती वाढीस लागेल. परिणामी करोनाचा संसर्ग नियंत्रणात येऊन मुंबईचे जनजीवन हळूहळू रूळावर येण्यास मदत होईल, शाळा, महाविद्यालये देखील यासोबत सुरू करता येतील, अशी शिफारस टाटा मुलभूत संशोधन संस्थेने (टीआयएफआर) एका अहवालाद्वारे मुंबई महापालिकेला केली आहे.

करोनाच्या संकटामुळे मागील सुमारे सहा महिन्यांपासून ठप्प झालेल्या मुंबई शहराला रूळावर आणण्यासाठी काय करता येईल, याचा अहवाल टीआयएफरच्या स्कूल ऑफ टेक्नॉलॉजी अँड कम्प्युटर सायन्सचे अधिष्ठाता डॉ. संदीप जुनेजा, प्रल्हाद हर्ष व रामप्रसाद सप्तर्षी यांनी बनवून तो पालिकेला सादर केला आहे. मुंबई पुन्हा सुरू करण्यासाठी कोविड-१९ चा गणितीय दृष्टिकोनातून अभ्यास करून टीआयएफआरने शास्त्रशुद्ध मॉडल बनवले आहे.

करोनाच्या संकटात मुंबई शहर आर्थिकदृष्या कोलमडले आहे. हे फार काळ सुरू राहणे मुंबईसाठी चांगले नाही. त्यामुळे मुंबई शहराची यंत्रणा लवकरात लवकर पुन्हा सुरू होणे, खूप आवश्यक आहे. यासाठी कार्यालयांमध्ये मर्यादित कर्मचारीसंख्या व रेल्वेसह इतर वाहतूकसेवा सुरू करून सप्टेंबर मध्यापर्यंत ३० टक्के शहर खुले होणे आवश्यक पाहिजे. ऑक्टोबरपर्यंत ५० टक्के व एक नोव्हेंबरला संपूर्ण मुंबई खुली करणे गरजेचे आहे. यामुळे डिसेंबर व जानेवारीपर्यंत मुंबईकरांमध्ये मोठ्या प्रमाणात प्रतिपिंड (अँटीबॉडीज) निर्माण होऊन सामूहिक प्रतिकारशक्ती वाढीस लागेल. त्यामुळे मुंबई सुरळीत होऊ शकते, अशी शिफारस या अहवालात करण्यात आली आहे, अशी माहिती डॉ. संदीप जुनेजा यांनी दिली. गणेशोत्सव काळात अधिकाधिक लोक घराबाहेर पडले होते. त्यामुळे गेल्या काही दिवसांपासून मुंबईत पुन्हा करोनाचे रूग्ण वाढत असल्याचेही त्यांनी सांगितले.

सप्टेंबरमध्ये घाईघाईत संपूर्ण शहर खुले केले तर मे आणि जून महिन्यासारखी स्थिती निर्माण होऊन करोनाची दुसरी लाट येऊ शकते. दररोज तीन ते चार हजार रूग्ण संख्येत वाढ होऊ शकतील. नोव्हेंबरला खुले केले तर १६०० ते २१०० पर्यंत रोजची रूग्ण संख्या वाढू शकेल. तसेच मृत्यूदर देखील कमी होईल. सामूहिक प्रतिकारशक्ती वाढीस लागल्याने डिसेंबर, जानेवारीत शहरातील झोपडपट्ट्यांमध्ये ७५ टक्के आणि इतरत्र ५० टक्के प्रतिपिंड तयार होतील, असे या अहवालात म्हटले आहे.

वाहतूकसेवा सुरू करताना सामाजिक वावर, मास्क व इतर सुरक्षेच्या साधनांचा वापर झाला पाहिजे. रेल्वे व कार्यालयांचे निर्जंतुकीकरण केले पाहिजे, अशी सूचना केली आहे.

‘शाळा, कॉलेज जानेवारीत सुरू करा’

मागील पाच महिन्यांपासून शाळा आणि कॉलेज बंद आहेत, याकडेही या अहवालात लक्ष वेधण्यात आले आहे. अँटीबॉडीज निर्माण होऊन सामूहिक प्रतिकारशक्ती वाढू लागल्यास जानेवारीत शाळा आणि कॉलेज सुरू केल्यास त्रास होणार नाही, असे मत डॉ. जुनेजा यांनी व्यक्त केले आहे.

Source: https://maharashtratimes.com/maharashtra/mumbai-news/tifr-repot-says-mumbai-may-develop-herd-immunity-by-december-january/articleshow/77964157.cms